Nama bida George Cross enggau PGB, ku Awang

KUCHING: Ex-Treker Iban Awang Raweng, seiku peranak tunggal nengeri Sarawak ke udah kala diberi pangkat pemerani ke pengambis
tinggi menua Britain – George Cross – temegah bendar ati ke perintah British ti agi meruan ingatka iya sampaika sehari tu.

Veteran ke beumur 83 taun tu asal ari Nanga Skrang, Sri Aman diberi pangkat George Cross ulih Raja George ari United Kingdom kena 20 November, 1951 setegal pemerani iya seiku bentaruhka nyawa beperang ngelaban penyelawai kominis begulai enggau empat iku soldadu British maya ke kena ipa kominis di Kluang, Johor kena 27 Mei , 1951.

Maya nya Awang dipasukka dalam 1st Battalion of The Worcestershire Regiment bepalan di Segamat, Johor lalu sehari maya nya rejimen Platoon No. 10, Delta matau baka selama lalu kena ipa lebih ari 50 iku bala penyelawai ke besenyata penuh.

Bekenangka insiden bedarah nya, iya madahka semua bala sida bakal memagang lebuh ke kena serang.

“Seiku ari sida, Prebet Hughes, ke di belakang aku kena timbak muak ke baruh pungung lalu enda ulih ngelaban agi aku empu taja pan darah geguchur pansut ari bekau telih, aku enggau senaka ulih ninding sereta matak sida ngagai palan ke likun agi.

“Kami betimbak ari pukul 9 pagi nyentuk ke 3 lemai semina ngetu maya bala kominis ngundur diri lebuh aku belabuh nikam bom grenit ngagai sida,” ku iya.

Iya madahka sepengudah bala kominis angkat ari kandang menua nya, baru raban pemantu datai lalu sida pan diterebaika ngagai sepital ke besemak dia.

Ba operasi nya setegal semengat pemerani iya diberi pangkat George Cross lalu iya beterima kasih ngagai basa ke udah diberi perintah British.

“Aku udu bebasaka perintah British setegal genap dua taun sekali aku dikangau ngulu Hari Pengada Queen di London. Aku berasai temegah enggau sereta dikebasa,” ku iya lebuh ke dikerandau The Borneo Post ditu kemari.

Awang ke baru pulai ari London laban ngulu pengerami ke sebaka madahka ngelama tu iya endang kena kangau belama.

Tang ku iya pemujur japai enggau pengawa ke udah dipejalaika iya ngagai menua semina dikelala perintah British tang enda kena kelala perintah besai enggau perintah nengeri.

“Suah ba pengerami dalam menua tauka nengeri aku enda kena kangau. Bisi ga kekadang aku betanyaka kebuah lalu maya nya mega aku nanya nama bida George Cross enggau Pingat Gagah Berani (PGB),” ku iya.

Iya madahka iya enda minta dikebasa tang ambis kurang perintah tauka mensia mayuh ngelala pengawa iya ke udah berambunka nyawa ngenanka menua enggau peranak menua.

Iya madahka ari penemu iya George Cross enggau PGB sebela tang lebuh maya gempuru rama iya suah kena tinggal.

Taja pia iya enda kala nyida kompelin setegal nya Serakup Veteran Sarawak Renjer (SRVA) udah ngatur iya betemu enggau Menteri Pemansang rama Tan Sri William Mawan.

“Nyangka ba aum pagila (sehari tu ) Awang deka diberi awak ngenataika pengasai ati iya ke enda kala diperita ngagai orang sebedau tu,” ku sekretari SRVA Capt. (R) Mohd Johari Ibrahim ke mega bisi dia maya ke dikerandau.

Read more: http://www.theborneopost.com/2012/07/03/nama-bida-george-cross-enggau-pgb-ku-awang/#ixzz1zZr7H8u4