Tuesday 3 July 2012

SDNU, DBNA dilawa nyadi pengabang Gawai Dayak DAD Sanggau: Banyan


KUCHING: Kaban Gerempung Bansa Dayak Sarawak Dayak (SDNU) enggau Gerempung Dayak Bidayuh Kebangsaan (DBNA), bisi dikangauka Dewan Adat Dayak (DAD) Sanggau di Kalimantan Barat, Indonesia, kena 7 Julai tu ila, ba pengerami Gawai Dayak di menua nya.
Sapit Presiden (I) SDNU, Anthony Banyan madah SDNU nyangka deka mai urung 15 iku kaban ngagai atur pengawa nya, ke kala diatur ba bulan ke sama taun siti nyin tadi.
Ku iya, bayar seiku ngulu pengerami nya semina RM230 mungkur endur diau, pemakai enggau insurans kerita (nitihka atur jalai alun menua nya).
“Laban raban ke ngulu pengerami nya deka mai entukar diri, kebuah bayar nya enda kelalu mar,” ku iya madah lebuh dikerandau ulih Utusan Borneo ditu, kemari.
Naka ke diatu, urung Sembilan iku ke udah netapka diri deka enggau bejalai berami enggau DAD.
Ku Anthony, atur program bejalai ngagai Kalimantan Barat deka angkat ari Kuching kena 7 Julai, lalu datai di Kalimantan Barat, atur program keterubah, iya nya pengerami Gawai di Sanggau, lalu ditangkan enggau pengawa adat enggau main asal di Rumah Betang Raya Dorie’k Empulor.
Hari kedua (8 Julai) lalu disambung enggau pengawa main asal enggau pekit lumba enggau main baka nyumpit, ngukir, bebatak tali, ngias bilik, manduk pemakai tradisional enggau sekeda main bukai.
Kelimpah ari nya, bisi mega diatur pengawa ngabang ngagai tiap buah ‘camat’ (sitak menua) ba hari kedua (8 Julai).
Hari penutup pengerami nya deka di tur kena 9 Julai di Rumah Betang Raya Doroe’k Empulor, alai sepengudah atur pengawa nya raban SDNU enggau DBNA deka angkat pulai ke Kuching.
Entara pemesai menua Kalimantan Barat ke deka sama nyambut penatai temuai tauka pengabang ari Sarawak tu, iya nya Ketuai DAD Kabupaten Sanggau, Presiden Majlis Adat Dayak Nasional (MADN) enggau Tuai Menua KALBAR, Gabenur Kalimantan Barat ti mega nyadi Ketuai DAD Provinsi Kalimantan Barat ke deka muka atur pengawa pengerami Gawai Dayak KALBAR nyengkaum bejadika Rumah Betang Raya Dorie’k Empulor.
Raban bansa Dayak ke deka ngulu penemuai ngagai KALBAR, tauka deka nemu penerang tu enggau silik agi, tau ngerejister tauka betelefon ngagai Anthony Banyan ba lumur 010-7848033 tauka 019-8884800


Read more: http://www.theborneopost.com/2012/07/03/sdnu-dbna-dilawa-nyadi-pengabang-gawai-dayak-dad-sanggau-banyan/#ixzz1zZsIFcml

No comments:

Post a Comment