SIBU: Pemutus Kaban Kunsil Nengeri (ADUN) Meluan Wong Judat deka ningkilka diri ari parti Barisan Nasional (BN) ngambika masuk Sarawak Workers Party (SWP) tegal deka napi Kaban Parlimen Julau Datuk Joseph Salang nadai pulaika pengurang sukung rayat ngagai BN. Seketari Politik Parti Rayat Sarawak (PRS) pati Sekuau Tungku Balang (gambar) madah jalai ke dipilih Wong nya engkeman enggau pengeransing iya empu ngenggaika Salang bediri ngetanka Parlimen Julau maya Pengawa Bepilih Besai Ke-13 (PRU13) tu ila.
“Manah iya ningkilka diri ari Parti Demokratik Progresif Sarawak (SPDP) laban pekara tu deka pulaika penegap kaul SPDP enggau PRS,” pia ku iya madah ngagai pengarang berita, kemari. Iya mantaika penemu nya maya nimbal penerang ke dibantai Wong nengah surat berita Utusan Borneo ensana madahka diri deka napi Salang nengah tikit SWP maya PRU13 tu. Nambahka nya baru, ku Tungku, ba jaku Wong madahka parlimen Julau aruh dipegai peranak menua nya empu, pekara nya ukai ke dalih deka ngasuh Salang badu ngetanka penuduk parlimen nya agi.
“Apin tu mega bisi chalun BN peranak menua bukai tang nyadi chalun ba penuduk ukai menua diri tang ulih nyadi pengari BN.
“Pekara tu aruh diperatika rayat ba Parlimen Julau,” ku iya nerangka. Berebak enggau tu mega Tungku madahka PRS enggau SPDP enggau parti kompenan BN ke bukai endang baka diri menyadi taja enda seperau tang seperabung dalam BN. “Kitai pechaya udah pekara tu (Wong tama SWP) tebantai, PRS enggau SPDP deka lantang agi beserakup sereta ulih nyikap diri enggau silik napi PRU13.
“Pia mega rayat baikka ba Parlimen Julau tauka Parlimen Selangau bela nemu ni bagi rayat ti patut dipilih sida nyadi pengari sereta ngasaika pemansang belama,” pia ku iya madahka baru. Ba Utusan Borneo kemari mega, Wong madahka iya deka betunga mua enggau presiden SPDP Tan Sri William Mawan Ikom enggau sapit iya Datuk Tiong King Sing di Kuala Lumpur alai nerangka pekara iya deka ningkilka diri ari parti nya.
Tang taja pan baka nya, pemutus aum sida tiga ila enda matak pemutus iya deka betapi enggau Salang.Pekara tu mega ngujungka tanya ngelama tu bakani pemutus Wong sepengudah bebendar madahka diri deka besatup enggau Salang ba PRU13 disaut.
No comments:
Post a Comment